Во среда, 08.02.2017 година ќе почне спроведувањето на втората мобилност од проектот ,,Professional VET cooperation development project‘‘.
Деветнаесет ученици од СОУ„Ѓорче Петров“ од Прилеп, претставници на медицинската струка и профилите медицинска сестра и физиотерапевтски техничар имаат убава можност да престојуваат осумнаесет дена во Мадрид, Шпанија, заедно со координаторот на проектот, Билјана Рошкоска и професорите – ментори, Соња Николоска и Антигона Димоска.
За време на практичната работа и обука учениците ќе ги развијат и покажат вештините и знаењата добиени во текот на наставата, но ќе ги надградат и јазичните познавања, ќе видат друга култура и начин на живот, ќе се дружат, осамостојуваат и ќе создадат нови пријателства.
Праксата е совршен искуствен учител и неизоставен дел од средното стручно образование.
Она што како искуство ќе го донесат од Шпанија, учениците ќе го применат во полесно совладување на теоретските часови, а понатаму и за поефикасно извршување на нивната хумана професија.
Проектот е финансиски поткрепен од програмата Еразмус + на Европската комисија и Националната агенција за Европски образовни програми и мобилност.
